29 sept. 2007

La plej bela geniulino

S-ino Dorota Rabczewska
Beleco estas subjektiva kvalito. Inteligenteco ankaŭ estas ege kompleksa kaj preskaŭ nemezurebla afero. Tial kiam oni parolas pri la plej bela geniulino, mi inklinas kritikante esplori la pretendon. Temas pri pola kantistino Dorota Rabczewska [Doda Elektroda - kiel prononci ŝian nomon?]. Ŝi konsideriĝas kiel la dua plej bela polino (ĉu rezulte de opinisondado?). Kaj kiam ŝi aliĝis al la organizaĵo Mensa, oni trovis ke ŝi posedas intelektan kvocienton 156. Oni taksas, ke la plejmulto de la homoj havas intelektan kvocienton (IK-o) inter 85 kaj 115. Ankaŭ konsideriĝas, ke iu persono estas mense malfruiĝinta se li/ŝi havas IK-on sub 70. Aliflanke persono kun IK-o pli ol 130 taksiĝas geniul(in)o.

Unue pri la beleco, ja ŝi estas sekse alloga kaj deziroveka. Tamen nia percepto de beleco (aŭ seksallogeco) formiĝas ĉefe kaŭze de kulturo, kutimoj kaj travivaĵoj. Ne ekzistas ĝenerala kaj universala interkonsento pri beleco.

Due pri la inteligenteco, tie ekzistas diversaj intelektaj kvocientoj; lingva/vorta, geometria/spaca, muzika, k. t. p. Precipe pri lingva/vorta mezuro de inteligenteco, ekzamenoj neniel povas esti universalaj. Miaopinie s-ino Rabczewska estas bela (seksalloga) kaj inteligenta, sed eble ne la plej bela geniulino. [Iuj taksas, ke la plej bela geniulino estas s-ino Danica Mae McKellar [pr. Danika Ma Makkeler] aktorino kaj matematikistino sed tio ankaŭ estas debatebla opinio]

Pretere mi iam ricevas tiun impreson, ke cerboj de virinoj pri iuj aferoj funkcias malsimile de la niaj. Ekzemple dum butikumado por aĉeti vestaĵojn por mi estas neeltenebla torturo, la plejparto de virinoj kiujn mi konas (patrino, kuzinoj, amikinoj k. s.) faras tion kun freneziga plezuro. Ili kapablas pasigi horojn kaj horojn en vendejoj (kaj finfine aĉeti nenion) dum mi iras al unua vendejo, provas malmultajn vestaĵojn kaj finfine haste aĉetas la plej aĉan el ilin.

27 sept. 2007

Ignoremaj esperantistoj!

Mi ne komprenas kial EVA (la Esperantlingva Verkista Asocio) ne konsideris min kiel kandidato por Nobel-premio. Ja! Tio veras, ke mi estas jam skribinta neniun libron elstaran, sed ili povus almenaŭ konsideri mian latentan talenton! Ho ve! Tiuj ignoremaj esperantistoj!

Ĉiuokaze mi esperas sukceson por EVA kaj s-ro Baldur Ragnarsson.

26 sept. 2007

Nomumita prezidento!

Hieraŭ mi volis skribi ion pri prelego de Ahmadineĵad en la universitato de Columbia [pr. Kolombia] , sed mi preferis atendi ĝis li parolis en la ĝenerala asembleo de UNo. Mi estas antaŭe skribinta (ankaŭ ĉi tie), ke ĉiufoje kiam tiu ulo malfermas sian buŝon, li kaŭzas honton de irananoj. Ĉi-foje ankaŭ ne estis escepto.

AhmadineĵadKontraŭe al multaj el irananoj kaj irandevenanoj, mi sentas nenian ĉagrenon pro tono per kiu la prezidanto de la universitato de Columbia, parolis al Ahmadineĵad. Ahmadineĵad meritis tian paroltonon kaj s-ro Bollinger [pr. Boliner] ne esprimis falsan eldiron. Nepre Ahmadineĵad ne estas prezidento reprezentanta min kaj mi esperas ke miaj neiranaj amikoj komprenu tion. Malgraŭ tio ĉio, tiel kolera kaj insulta paroltono eĉ por paroli al homo kiel Ahmadineĵad, ne estis akceptinda el flanko de digna akademiano kiel s-ro Bollinger. Kompreneble li rajtis kritiki Ahmadineĵad kaj eĉ nomi lin diktaturo, sed mi preferus se li sindetenus kaj ne aldonus insultajn adjektivojn kiel needukita, malkuraĝa kaj etanima.

Ahmadineĵad nepre mensogis kiam diris, ke en Irano virinoj ĝuas grandan liberecon. Ankaŭ pli antaŭe li estis dirinta, ke en Irano ricevi satelitajn tv-elsendojn ne estas tiom malpermesata! Tio ankaŭ estis mensogo. Kiam en la universitato Columbia li diris, ke en Irano ni ne havas samseksemulojn [alia mensogo], ĉeestantoj mokridis. Tamen oni ne forgesu, ke retoriko de Ahmadineĵad ne ege malsamas de tiu de la usonaj konservativuloj kiuj opinias semseksemo estas perversio kuracebla kaj oni devas kuraci/puni/ne agnoski samseksemulojn. Aliflanke Ahmadineĵad pravis kiam diris, ke palestinanoj havas nenian rolon en Holokaŭsto kaj ili ne devas puniĝi pro ĝi.

Ahmadineĵad prelegis en prestiĝa universitato en Usono. Tie li kaŭzis honton por irananoj. Samtempe hieraŭ vespere mi vidis, ke en tv-programo John Stewart [pr. Jon stuŭart] intervjuis S-ron Eva Morales la prezidento de Bolivio. Tiu programo estas parodia kaj komedia do neprestiĝa. Tamen s-ro Morales tre bone respondis kaj laŭdiĝis per la ĉeestantoj. Kontraŭe al Ahmadineĵad li ĉeestante en neprestiĝa programo kaŭzis honoron por sia popolo.

P.S: Mi nur ŝatas scii ĉu s-ro Bollinger same severe kaj insulte parolus al Reĝo Fahad (Saŭdarabio), Hosni Mobarak (Egiptio) kaj Parvez Muŝaraf (Pakistano) [Vidu kiel s-ro Bollinger estas laŭdinta la pakistanan diktaturon]? Ĉu ili ne estas etanimaj diktaturoj?

24 sept. 2007

Senpaga tekstprilaborilo por Vindozo

Kvankam mi jam havas kaperitan version de la programaro Microsoft Office [pr. Mikrosaft afis], tamen mi decidis depost nun kaj sur mia nova komputilo instali nur laŭleĝajn programojn. Feliĉe por linukso jam ekzistas tre bonaj senpagaj programoj por labori kun tekstoj, prezentaĵoj kaj datentabeloj (Open Office - pr. Open afis - estas la plej bone establita inter ili). Por Vindozo ĝis nun ne ekzistis bona programo tia. Feliĉe antaŭ nelonge IBM prezentis la programaron Lotus Symphony [pr. Lotus Simfoni]. Nun mi estas elŝutinta ĝin kaj planas instali ĝin sur mia Vindozo Visto.

23 sept. 2007

El Avesto (12)

Post longa paŭzo nun estas tempo por prezenti alian tradukon de Gathao. Tio estas traduko de la deka verso de ĝia unua parto (Ahnavajiti).

Unue ĝia transskribo per la esperanta alfabeto:
At jeng aŝa-atĉa voista vanghe-uŝĉa daceng managho eretveng mazda ahura aebijo perena apaniŝ kamem, at ve ĥŝmaibja asuna vaeda ĥvaraicja vaintja srava.

Ĝia traduko estas:
Ho! Mastro de la saĝeco, plenumu dezirojn de tiuj kiujn vi, pro iliaj virtoj kaj bonaj pensoj, konsideras meritaj. Mi bone scias, ke elkoraj preĝkantoj sincere oferitaj al vi ne restos nerespondataj.

Enuitaj legantoj eble demandos, kiom da versoj havas Gathao. Ĝi konsistas el 5 ĉefaj partoj kiuj ĉiuj havas sian propran nomon. Ĉiuj el tiuj partoj mem konsistas el ĉapitroj kaj ĉiu ĉapitro enhavas nombron da versoj. La 5 partoj de Gathao estas:

  • Ahnavajiti, enhavanta la ĉapitrojn 28, 29, 30, 31, 32, 33, 34
  • Uŝtavajiti, enhavanta la ĉapitrojn 43, 44, 45, 46
  • Spentamajiti, konsistas el 4 ĉapitroj, 47, 48, 49, 50
  • Vohuĥŝatra, enhavanta la ĉapitron 51
  • Vaheŝtueŝ, enhavanta la ĉapitron 53.

Ĝis nun mi tradukis 10 versojn de la ĉapitro 28 de la unu parto, Ahnavajiti, de Gathao [restas nur unu plu verso 11].

Arkivo de tradukoj de Avesto.

20 sept. 2007

Nia loĝejo

Nia loĝejo ne estas iu lando. Ni eĉ ne loĝas sur la tero. La koro de tiuj kiujn ni amas, estas nia vera loĝejo.

Nous n'habitons pas des régions. Nous n'habitons même pas la terre. Le coeur de ceux que nous aimons est notre vraie demeure.

La franca verkisto kaj poeto Christian BOBIN [pr. Kristijan Boban] (1951 - ).

19 sept. 2007

Post 17 jaroj

Verdaj Okuloj
En 1985 fotografisto de la revuo National Geographic [pr. Naŝnal Ĝeografik], Steve McCurry [pr. Stiv Makkuri] kaptis foton de afgana knabino kiu havis allogegajn verdajn okulojn. Tiun foton la tuta mondo memoros por ĉiam. Ĝi ŝancelis korojn de milionoj da homoj ĉirkaŭ la mondo kaj kaŭzis, ke unu el kovriloj de la revuo iĝis inter la 100 plej bonaj revukovriloj de la tuta historio.

Sed tiuj verdaj okuloj ankaŭ longtempe hantis la fotografiston. Dum 17 jaroj li strebis trovi tiun knabinon kaj finfine en 2002 sukcesis retrovi ŝin en Afganio. Ŝia nomo estas Ŝarbat Gula kaj jen alia foto de tiuj korokaptantaj okuloj post 17 jaroj.

P.S 1: Antaŭe mi eĉ ne kapablis imagi, ke tiom da pentraĵoj estas faritaj de ŝia allogega vizaĝo. Jen kelkaj el ili: (...1...), (...2...), (...3...), (...4...), (...5...).
P.S 2: Tie ekzistas almenaŭ du organizaĵoj nome de ŝi; fonduso por afganaj knabinoj (prizorgata de la revuo National Geographic) kaj Centro por Justeco.

17 sept. 2007

Lokaj balotoj en Kanado

Perlo en Maro
Lastatempe rilate lokajn balotojn en Kanado, du aferoj starigis debatojn. Unue en Kebekio oni proponis, ke tiuj virinoj kiuj kovras siajn vizaĝojn ne havu rajton por voĉdoni. Tie argumento estis tio, ke por iĝi certa pri identeco de la voĉdonanto oficistoj devas vidi vizaĝon de tiu persono. Teknike kaj praktike en Kanado multaj voĉdonas poŝte kaj ankaŭ por ĉeesta voĉdonado oni ne necese bezonas certiĝi pri identeco de la voĉdonanto vidante lian/ŝian vizaĝon. Tial kortumoj malaprobis la proponon. Mi mem kvankam tute ne ŝatas hiĝabon (en neniu ajna formo) kaj konsideras ĝin kiel insulto al viroj kaj maljusteco pri virinoj, tamen ne trovas tian proponon prava. Fakte kvankam mi ne alproksimiĝos al virinoj kiuj surmetante hiĝabon ja montras, ke ili estas jam konsiderintaj min (kaj ĉiujn aliajn virojn) kiel bestoj nebrideblaj kaj seksumemaj monstroj, tamen se ilia elekto estas ne pro malkaŝe fizika premo (el flanko de iliaj patroj, fratoj, edzoj k. s) mi respektos tiun elekton (kaj sentos kompaton pri ili).

Mi opinias, ke viroj tute ne rajtas trudi siajn dezirojn pri tio kiun surmetu virinoj al la socio. La elekto de hiĝabo estas respektinda ĝis tiam kiam ĝi ne estas surbaze de premo. Tio rilatas al la dua afero kiu kaŭzis debatojn. Dum la baloto en Toronto, kandidato proponis financi religiajn lernejojn per la publika mono. En kunteksto de hodiaŭa Kanado tiu propono estas logika ĉar jam depost longa tempo la katolikaj lernejoj uzas la publikan monhelpon. Tamen mi preferus se neniu religia lernejo (nek katolika nek iu ajna alia religia lernejo) estus financita per publikaj monhelpoj. Miaopinie nur familio devas decidi pri religiaj instruoj de infanoj kaj tio ankaŭ devas esti kongrua kun rajtoj de neplenkreskuloj kaj zorge limigita. Mi opinias, ke ŝtatoj devas ne interveni en aferoj rilate religiajn instruojn de neplenkreskuloj kaj ili devas konservi la publikan spacon de la socio neŭtrala kaj senpartia rilate religiajn aferojn. Samtempe ili devas protekti neplenkreskulojn kontraŭ malhumanaĵoj kiuj trudiĝas al ili nome de religio. Pri la hiĝabo mi tute aprobas decidon de Francio por malpermesi ĝin en la lernejoj. Tio estas ĉar almenaŭ en lernejoj, knabinoj nun povas sperti vivon sen trudoj kiuj ofte okazas per iliaj (vir-)familianoj. Nun la publika spaco de lernejoj permesas, ke neplenkreskuloj eskapi premojn kiujn ili ne kapablis antaŭe eskapi. Tiel kiam ili plenkreskiĝos, ili almenaŭ pli konscie povos juĝi kaj elekti siajn vojojn. Kaj la publika aŭtoritato estas protektinta ilian liberecon [almenaŭ en lernejoj].

12 sept. 2007

Pri politiko en Japanio

La japana ĉefministro, s-ro Ŝinzo Abe, demisiis! Nun kio okazas? Ĉu la japana parlamento decidos pri la venonta ĉefministro? Kiujn diferencojn oni devas atendi rilate la politikajn decidojn en Japanio? Kiujn efikojn tiu ĉi demisio havos? Ĉu iu povas respondi tiujn demandojn?

Bonvole se japana amiko en sia E-blogo skribos pri tiu evento, ankaŭ metu komenton en mia blogo por, ke mi trovu ĝin.

11 sept. 2007

Demando

Kion signifas la anglaj terminoj "Tenure" kaj "Tenure Tracker" (rilate akademian karieron)? Ĉu iĝi "tenure" en Kanado estas malsimila de tio en Usono?

7 sept. 2007

Plenrapide al alia infero en la mezoriento

Kvankam mi, kiel oponanto de la islama respubliko en Irano, ŝatas vidi puniĝon de tiu reĝimo kaj ĝiaj ĉefregantoj, tamen kiam mi pensas pri sufero de ordinaraj homoj okaze de eventuala armea atako al la lando mi ege angoras. Bedaŭrinde tiel ŝajnas, ke ni plejrapide alproksimiĝas al tia evento. Premo al la islama respubliko iĝis vere neeltenebla (por la reĝimo) kiam Usono decidis aldoni la revolucian gvardion al sia listo de organizaĵoj kiuj helpas terorismon.

B52 AviadiloPor tiuj kiuj eble ne scias, mi devas diri, ke la revolucia gvardio fondiĝis tuj post la islama revolucio en 1979. Ĝiaj anoj havas fortajn ideologiajn konvinkojn kaj ĝi fondiĝis ĉefe por protekti la novestablitan reĝimon kontraŭ danĝeroj. Unue ĝi estis malgranda armita forto sed okaze de milito inter Irano kaj Irako, ĝi plifortiĝis kaj grade transformiĝis al vera armeo. Nuntempe ĝi prizorgas pri eksterlandaj operacioj (ekzemple helpi Hizbolahon en Libano aŭ Hamason en Palestino, vivatenci kontraŭ oponantoj de la reĝimo en Eŭropo, k. t. p). Ankaŭ ĝi respondecas pri iu ege disvolvita programo por konstrui longdistancatingajn misilojn. Ĝi havas tre grandan influon sur la politikaj eventoj en Irano. Kelkaj el parlamentanoj kaj la nuna prezidento, Ahmadineĵad, estas ĝiaj eksmembroj. Ĉiuokaze aĥila tendeno de tiu organizaĵo estas ĝia ega enmiksiĝo en ekonomiaj agadoj. Tial ĝia klasifikiĝo kiel subtenanto de terorismo per Usono povas severe minaci bonfarton kaj liberecon kiujn ĝis nun ĝiaj anoj ĝuis. En Irano iomete post deklaro pri intenco de la usona registaro, oni ŝanĝis la ĉef-komandanton de la gvardio. Tio estis grava evento ĉar li estis en tiu posteno dum 10 jaroj. Tio per iranaj observantoj konsideriĝis kiel signo pri efiko de la usona premo sur la gvardio.

Aliflanke eble vi estas jam aŭdintaj pri aviadilo armita de nukleaj bomboj kiuj flugis super Usono. Oficiala versio pri la evento aludas al eraro. Sed usona blogisto kiu estas eksa agento de la sekurecaj organizaĵoj opinias, ke la okazaĵo ne povas esti senintenca simpla eraro. Unue li notas, ke oni ne metas nukleajn armilojn en aviadilo por simple turismflugi kaj ĝui flugvojaĝon. Tion oni faras kiam aŭ ekzistas minaco aŭ la farinto intencas transporti tiujn armilojn al alia loko. Due li rememorigas, ke kontraŭe al holivudaj kinfilmoj en la realo meti nukleajn armilojn en aviadilo ne estas simpla afero de malaltrangaj oficiroj. Li ankaŭ informas, ke la aviadilbazo al kiu la menciita aviadilo estas fluginta (ang. Barksdale – pronc. Barksdejl) estas elirpunkto por operacioj en la mezoriento. Mi pensas, ke oni ne intencas uzi tiujn nukleajn armilojn en Irako (aŭ Afganio). Miaopinie en la mezoriento restas tri ĉefaj celoj. Aŭ oni volas uzi la nukleajn armilojn kontraŭ Pakistano kaj ĝia jam ekzista nuklea arsenalo, se la registaro de s-ro Muŝaraf alfrontiĝos al serioza problemo tie. Aŭ oni volas uzi ilin kontraŭ la sanktaj lokoj de islamanoj en Saŭdarabio, se ili faros grandskalan atakon similan al tiu de la 11-an de septembro kontraŭ la okcidento. Aŭ oni volas uzi ilin kontraŭ la islama respubliko en Irano. Alia ebleco estas tio, ke la evento kaj publikiĝo de informoj pri ĝi estas intenca plano por sendi nemiskompreneblan signalon al regantoj en la islama respubliko por montri, ke Usono ne plu indulgos malamikajn agojn (de Irano).

Por kompletigi la bildon, la leganto eble estas jam informita pri tiu pretendo, ke hieraŭ la kontraŭaviadila defendoforto en Sirio estis pafinta al Israela aviadilo. La israela aerforto ne estas konfirminta nek dementinta la informon. La observantoj estas sugestintaj, ke Israelo volis taksi pretecon de la kontraŭaviadila defendoforto en Sirio. Tion mi ankaŭ kredas. Sed mi ankaŭ ŝatas rimarki, ke la operacio ne celis pretigi Israelon por eventuala konflikto kontraŭ Sirio. Ĝi okazis ĉar inter Israelo kaj Irano ekzistas du landoj; Sirio kaj Irako. Nu! Irako ne havas kontraŭaviadilan defendoforton. Do por atingi Iranon restas nur obstaklo de Sirio! Ĉu registaro en la islama respubliko komprenas tiujn signalojn? Mi tutkore esperas, ke jes!

6 sept. 2007

Esperantlingva geografio

Hodiaŭ mi volis skribi blogeron kaj por montri ion rilate al ĝia temo mi bezonis mapon. Serĉante esperantalingvan mapon sur la interreto mi trovis, ke tia mapo ne ekzistas. Ĉu mi ne bone serĉis? Ĉu esperantlingva(j) mapo(j) de la mondo kaj ĝiaj diversaj partoj ekzistas?

Mallibera

Mallibera
Liberulo kiu enamiĝas al mallibera persono plu ne estas libera,
Tia persono iĝas eĉ pli mallibera ol sia amata malliberulo

4 sept. 2007

Helpopeto

Pardonu min se tiu ĉi blogero estas iomete tro teknika. Mi bezonas vian helpon. Eble amiko esperantista povas helpi min por solvi tiun ĉi problemon. Por fari parton de miaj eksperimentoj, mi bezonas funkciigi interkomunikadon inter oscilografo kaj komputilo. Mi uzas la oscilografon Tektronix TDS 2012B. Por konekti ĝin al la komputilo mi uzas konektilon de tipo USB kaj mi instalis la kromprogramon TekVisa kiu ebligas fari programojn por komuniki kun la oscilografo. Mi lanĉis ekzemplojn kiuj estas disponigitaj kun la kromprogramo, sed ili ne sukcesas establi la interkomunikadon. Por solvi la problemon mi sekvis la instrukciojn. Pere de simpla programo mi povas rekonigi la oscilografon al la komputilo:

status = viOpenDefaultRM(&rm);
if (status < VI_SUCCESS) goto error;

status = viOpen(rm, "USB0::1689::871::C030112::0::INSTR", VI_NULL, VI_NULL, &vi);
if (status < VI_SUCCESS) goto error;

Kaj mi povas eltiri ĝiajn karakterizaĵojn:

status = viWrite(vi, (ViBuf) "*idn?", 5, &retCnt);
if (status < VI_SUCCESS) goto error;

memset(buffer, 0, sizeof(buffer));
status = viRead(vi, (ViBuf) buffer, sizeof(buffer), &retCnt);
if (status < VI_SUCCESS) goto error;

Eĉ mi povas eltrovi, ke kiom da datenoj ekzistas por ĉiu signalokurbo sur la oscilografo:

status = viQueryf(vi, "hor:reco?\n", "%ld", &elements);
if (status < VI_SUCCESS) goto error;

Sed ekzemple kiam mi volas eltrovi la vertikalan skalon per la instrukcio:

status = viQueryf(vi, "YOFF?\n", "%f", &yoffset);
if (status < VI_SUCCESS) goto error;

Mi ricevas la jenan erar-mesaĝon:

Error - The specified operation or request timed out.

Ĉu iu havas sperton pri tiuj ĉi stultaj aparatoj?